මෙන්න "Fun Page" ෆුල් ෆන්.....

මේ දින වල රාත්‍රිය ඉතා දිගුය. ඊට හේතුව මට නින්ද නොයාමය. හේතුවක් කීමටද නොදනී. හිත මලකඩ කා ඇති සෙයකි. අහෝ ඛේදයකි. ඊයේ රාත්‍රියද එසේමය. නිදි දෙව් දුව මාව ඩිවෝස් කර ඇති සෙයකි. මෙසේ නිදිවර්ජිතව රැය පහන් කල ඊයේ රාත්‍රියේදී මගේ නෙත ගැටුනේ මගේ කාමරයේ තිබූ පරන බෑග් තඩියක්ය. පාසල් කාලයේදී අපේ අම්මාගේ අධි ආරක්ෂිත කලාපයෙන් වහන් කල යුතු බොහෝ දෑ තිබුනේ මෙහිය.

නිදි දෙව් දුව මාව ඩිවෝස් කර ඇති මේ රාත්‍රියේදී මට සිතුනේ මේ බෑගය ඇද බැලීමටය. මුලින්ම හමු වූයේ O/L කරන කාලේ නිර්මාණය කල Teen Book එකක් සහ Autograph එකක්ය. Teen Book  කියන විට මතක් වූයේ අපේ හිතූ නංගිගේ මෙන්න මේ පෝස්ටුවය. පහල ලින්කුවෙන් කැමති අයට බැලීමට හැකිය.
-TEEN Books , Autographs සහ මම -

මේ වෙලාවේ මම Teen Book ගැන කතා නොකරමි. මා මතකය අවධි කරන්නේ මේ Autograph වල අවසාන පිටු කිහිපය නොහොත් Fun Page ගැනය. A/L කාලයට වඩා වැඩිපුර මා සිත් ගත්තේ O/L කාලයය. ඊට හේතු රාශියකි. කියන්නට ලැජ්ජයි..මෙතනින් ඉදිරියට තිබෙන්නේ O/L අවසාන කාලයේ මගේ Autograph  එකක තිබූ Fun Page කිහිපය ගැනය. 

මෙම පිටුව පටන් ගෙන තිබුනේ මගේ අනාගතය වෙනුවෙන් සියළුම යහළු යෙහෙලියන්ගේ හද පතුලෙන්ම නැගුණු සුභ පැතුමකින්ය. එය මෙසේය.

"ගොඩ මඩ දෙකම සරු කරනා එකම  සතා
මී හරකෙක් වේවා ඔබෙ පලමු  පුතා
රෑ යාමේ හූ කියනා එකම  සතා
වල් නරියෙක් වේවා ඔබෙ දෙවන පුතා..."

බලන්න කොච්චර ආදරණිය ප්‍රාර්ථනාවක්ද කියලා. මෙහෙම යාළුවොනේ මට හිටියේ අම්මපා....
ඊලගට ඇත්තේ මෙවැනි ඔටෝ වලින් වැඩක් නෑ කියාය. මෙය ලිව්වේ කෙල්ලෙක්නම් ඇය සොයාගැනීම ඉතා අගනේය. එය මෙසේය.

"ඔටෝ මොටද බං
මොටෝ රියක් ගං
ඒකේ නැගල බං
අපි දෙන්නම යං"

අනේ ඉතින් මෙහෙම යන්න තිබ්බනම්...
මී ලගට ඇත්තේ මාව දුටු විට මගේ යහළුවන්ට ඇතිවූ හැගීමය.

"ආදරේ හිතෙනවා දැක්කම
එළුවෙක් වාගේ ලස්සනයි..
පොඩ්ඩක් ඉන්න සුදෝ මම
තණකොල ගේනවා ඇත්තමයි"

ෂෝක් නේද....
ඉන් පසු ඇත්තේ මගේ යහළුවෙකුට ඇත්තටම සිදු වූ දෙයක්ය.

"නින්දෙන් සෙව්වා මා පැදුරේ
සිරියා..නෑ මා ලග සිටියේ...
ලං වී බැලුවා හිලෙන් දොරේ
ගුණපාලයි සිරියයි මැද මිදුලේ... "

පව් නේද....
මෙයද ඇත්තටම සිදුවූවක්ලු.

"ඔබ එනවා බලා
මට වමනේ ගියා
අමු ඉගුරු සොයා
පොල රවුමෙ ගියා"

ඔන්න ඔහොමයිලු උනේ..
මාගේ සුමිහිරි නාදයෙන් කන් පිනා ගිය මගේ යෙහෙලියක් ලියා ඇත්තේ...

"අමතක උනත් සීගිරියේ සිංහ කට...
අමතක වෙන්නෙ නෑ තරිදුගේ හැකර කට.."
කොච්චර ආදරණීයද.....
මීලගට ඇත්තේ මං බදින දාට මුං කරන දේවල්ය...

"ඩෙංකුටුබෙර ගහන දාට
වෙඩින් කේක කපන දාට
....බබා බදින දාට
අපි එන්නම් කේක කන්න"

"මා වැනි බිලින්දා
වර වර ලගට කැන්දා
තරිදුගේ නැන්දා
කවුරු වේදෝ අනේ මංදා.."
"(වේවිදෝ ___ගේ අම්මා)"

ඔය හිස් තැනට තියන නම ඔනිනම් කිව්වෑකි. ඒත් ඒ නමේ අයිතිකාරිත් මේක බලන හින්දා ඕනි නෑ..;)
මීලගට ඇත්තේ වැදගත් ඔවදන් කිහිපයකි.

"තරිදු,
        LOVE is අනියතං
        BOOT is නියතං"

"o/l ජාතිං සංසාරං
සම්මානං අති දුර්ලභං
මන්ත්‍රී නං සරණං නැත්නං
රස්සා නං අනියතං"

"සියළු Science කාරයෝ
නැසෙන සුළුය
නොපමාව Art
කරන්න....."

"අයිසැක් නිව්ටන් අපිත් දකින්නැති
ගණන් හදන්නැති ඒ කාලේ
කැම්පස් යන්නට ලකුණක් මදි ඇති
ඒකයි තවමත් මහපාරේ...."

"එල්ලේන සියල්ල
වම්බටු නොවේ..."
දැන් ලියන්නේ මගේ හොදම යහළුවෙක්ගේ ඒකායන ප්‍රාර්ථනාවය...

"මේ ඉරිදා ගිය ඉරිදා වාගේ නොවන්න
ඈ එනවා මා යනවා ඈ හමුවන්න
ඈගේ සිතුම් මාගේ පැතුම් සුන් නොකරන්න
අනේ සර් වේලාසන class අරින්න...."

බලන්න කොච්චර අහිංසක ප්‍රාර්ථනාවක්ද......
මෙන්න තවත් පුංචි කතා ටිකක්.....

"අම්මේ...අන්න
KISS මාමා එනවා
පොඩ්ඩක් හිටින් දුවේ
මං මූණ හෝදගෙන එනකං"

"සද මිදුලට එනවා...........
එහෙනං නීල් ආම්ස්ට්‍රෝං හදට ගියේ
මොන අහවල් එහෙකටද"

"ඇවිළුණු ගිනි දැල්
නිවි නිවි යාද්දී
ඈ මට හමු වූවා..........

ඈ බොල කොල්ලෝ..
තෝ හොයාගත්තේ පිච්චිච්ච ගෑනියෙක්ද?%$^%$^"

මගේ යෙහෙලියකට අවුරුදු ගානක් තිස්සේ සිතේ තිබූ ප්‍රශ්ණයක් ඇය මගෙන් ඇසුවේ මෙසේය...

"කෙසෙල් ගෙඩිය ලෙලි ගහලා
ලෙල්ලද කන්නේ...
උඹෙ අම්මට උඹ විතරද
ගොනෙකුට ඉන්නේ...."

ෂික්..මට තාම බැරි උනනේ මේකට උත්තරයක් දෙන්න...
මගේ මේ ඔටෝ එක දුටු මගේ සමීපතමයෙක් මෙසේ එහි සැමරුමක් තැබුවේය...

"අනේ රිලා මොටෝ..
තොට මොකටද ඔටෝ.."

මෙය නම් මගෙ පස්සෙන් ආපු කෙල්ලෙක් ලිව්ව එකක්ය...(වැරදුනාද මංදා)

"දිගට දිගේ දිග කලිසම ඇන්දාට...
මැණික් කටුව ගල watch එක බැන්දාට...
ඇසක් ගසා I Love You කිව්වාට...
අපි රැවටෙයි උඹලා වැනි කොල්ලන්ට...
(රැවටෙන අයත් ඉන්නවනේ)"
ඉහත කවියේ වඩාත් වැදගත් වරහන් ඇතුලේ තියන කොටසය...
දැන් ඇත්තේ තේරවිල්ලක්ය....මෙය කියවන අයටද හැකිනම් තේරිය හැක.

"දොඩම් සේ දැක්කා
තැඹිලි සේ වික්කා...
දිනක වට්ටක්කා
වැලක එල්ලී තිබෙනු දැක්කා..."
මෙය ලියා ඇත්තේ නම් ඒ  දිනවල සිටම හදවතට සමීප වූ කෙනෙක්ය..(ඊ.............ලැජ්ජාවේ බෑ)

"සයුරේ රළ සේ
අහසේ තරුසේ
මිතුදම් පවතී
ලොව සැමදා...."

ඉතින් මේ Fun Page ඉවර වන්නේ එය ඉවර බව මුළුමහත් ජනී ජනයාට සැල කිරීමෙනි. එය මෙසේය...

"ගීයක් ගයයි බකමූණයි උගෙ නෝනයි....
සමරු පොතේ පිටු මෙතනින් අවසානයි..."

"රෑ තිස්සේ හූ කියනා නරියෝ නරියෝ...
සමරු පොතේ පිටු ඉවරයි චෙරියෝ චෙරියෝ..."
************************************************************************
මම O/L කලේ 2005  වසරේය. (බලන්ඩකො ඉතින් තාම පොඩි කොලු පැටියෙක්නෙ මූ..)
සමරු පොත කියවන විට ඇවිස්සුනේ පරණ මතකයන්ය. සමරුපොතේ ලියා ඇති විදිහටම සමහරු අදටත් මගේ දුකට සැපට සිටියත් අප සහෝදරයන් වගේයැයි කී අය අද ආගිය අතක් නැත. එය ලෝක ස්වභාවයය.. මෙය කියවන අයටත් එසේ විය හැක. එදා ආදරේ කල අය අද ලග නැත. එදා ආදරේ නොකල අය අද ආදරේ කරයි. හොදින්ම තේරුම් ගත්ත අය දැන් හොයාගන්නට නැත. පැත්තක සිටි අය ජීවිතයට ලං වෙලාය. කාලය මැව් වෙනසක අරුමේ කියා සිතෙන්නේ මෙවිටය. ජීවිතේ හැටිය..ජීවනවා කියන්නේ මෙයටය...හ්ම්....!!!